الحبوبة عمود البيت . ولاشنو؟

بسم الله الرحمن الرحيم
السلام عليكم
دي اول مشاركة لي في منتديات كبار اتمنى انها تعجب كل متصفح.
زي ما عارفين عندنا مثل يقول الما عندو كبير يشتري ليهو كبير.
يعني شنو ؟
يعني الزول في مسيرة حياتو يحتاج لزول يكون ليهو سند يرجع لرأيه
في كل صغيرة وكبيرة . كمان بيحتاج لدليل يوجهه , يدله على الطريق الصحيح
والإستفادة من الخبرة في الحياة .
بدون لفة طويلة عليزة أقول الحبوبة حبيبة وحنونة هي العزوة هي الشجرة الضليلة
هي الحجاية (فاطمة السمحة ـ ود النمير ـ النعجات الثلاثة ـ الغول ..........الخ).
تعرفو انا مسجلة في المنتدى باسم حبوبتي من شدة حبي ليها الله يرحمها ويسكنها فسيح جناته
الحمد لله ما غالية على ربها . بس والله بيتنا الكبير كان عامر بحسها مليان حيوية ودفء
لا يوصف الله يعظم أجرها .
صراحة الجواي اكتر واكبر بكتيييير من الفي السطور . اتمنى كل واحد يكون عندو حبوبة حلوة
وجميلة وحبيبة زي حبوبتي ريفة .
العندو اي موقف اياً كان نوعه يدخل ويورينا تجربة الحياة وطعمها بوجود الحبوبة.